WWF ordne ovttasbargoleairra Ohcejogas – áigut divodit divrras sámedálu
WWF ja Meahcceráđđehusa luonddubálvalus ordnejit ovttasbarganleairra Ohcejoga Jeagelveaji sámedálus suoidnemánu maŋemuš vahkus. Leairra áigge váldodeaddu lea šillju divrras kulturbirrasa áimmahuššamis. Luonddubálvalus joatká dán jagi maid Jeagelveaji visttiid ortnegisdoallama, mas ovttasbargoleairalaččat leat veahkkin.
Jeagelveaji sámedállu lea riikkadásis mearkkašahtti oppalašvuohta, mas seammá šiljui gullet boares visttit, kultureatnamat ja dološmuitosajit. Jeagelveaji divrras gieddi lea ovdal báhcan measta fuolahusa haga ja danin dat lea miesttaluvván.
WWF:a ovttasbarganleairra áigge gieddi njáskojuvvo nu ahte šaddá rabas nugo ovdalaš áiggiid leamaš. Giettis šaddet áitojuvvon márjjáčoavdagat ja davverásselávki, maid seailun gáibida gietti láddjema jeavddalaččat.
”Ollásii goalmmátoassi Suoma áitojuvvon šlájain šaddá kultureatnamiin, mat leat šaddan dološ eanageavahanvugiid čuovvumuššan. Lihkus dáid áitojuvvon šlájaid sáhttá gádjut ovdamearkka ovttasbarganleairrain. Ná konkrehtalaš luonddusuodjalanbargu bálkkaša”, dadjá WWF:a suodjalanáššedovdi Matti Ovaska.
Luonddubálvalus joatká geasset Jeagelveaji visttiid ortnegisdoallama, vai olbmot besset oahpásmuvvat dállui. WWF:a ovttasbargoleairra olbmot oassálastet ovttasbargovahkus visttiid ortnegisdoallamii nu ahte bihkkadit gáhtuid ja huksejit muoras sávzaáiddi. Lea plánejuvvon, ahte boahttevuođas sávzzat dollet gietti ortnegis ja ealáskahttet dálu. Jurdda sávzaguođohanvahkuin bođii guovllu olbmuin dalle go ordnejuvvui álbmotdilálašvuohta Jeagelveaji dálu geavaheami birra. Sávzaguođoheaddjit livčče friijadáhtolaš bargit, geat orrot dálus ja fuolahit sávzzaide čázi ja muđuige sávzzaid buresbirgejumis. Sávzaguođohanvahkuin fidnejuvvon boađut geavahuvvojit Jeagelveaji dikšumii.
Šillju máŋga divrras vistti ja gieddi muitalit guovllu dološ ealáhusain ja eallindábiin. Dálu vuođđudii báikki sápmelaš Antti Jovnnabárdni Warsi jagis 1866. Seammá báikkis lea ássojuvvon juo guhká ovdal dán ja šiljus leat oaidnimassii logit goahtesajit. Jeagelveajis lea ássojuvvon gitta 1969 rádjai, ealáhus čoggui guollebivddus ja sávzadoalus.
Ohcejoga Deanuleagi boares Jeagelveaji dállu sirdásii Musealágádusas Meahcceráđđehusa luonddubálvalusa fuolahussii jagis 2014. Dikšundoaimmat leat oassin fidnus, mas Meahcceráđđehusa háldui sirdásan vistebázahusat ja eará visttit divvojuvvojit vai dat šaddet ealli dáhpáhusbáikin almmá vajáldahtekeahttá kulturárbevieruid. Ulbmilin lea, ahte čuozáhagat šaddet oahppáseabbon, illudahttet ja buktet buresveadjima galledeaddjiide, buktet fitnodatservviide vejolašvuođaid ja dáinna lágiin euroid báikkálašekonomiijai.
WWF lea ordnen ovttasbarganleairraid jagi 1977 rájes sierra guovlluin Suomas.
Lassedieđuid leairra birra:
Suodjalanáššedovdi Matti Ovaska, WWF, 040 727 3149, matti.ovaska@wwf.fi
Párkahoavda Pirjo Seurujärvi, 0400 125782, pirjo.seurujarvi@metsa.fi
Lassedieđut Jeagelveaji dálu birra:
Kulturárbedieđu sierraplánejeaddji Siiri Tolonen, Meahcceráđđehus, 040 860 3800, siiri.tolonen@metsa.fi
Bargohoavda Alexander Kopf, Meahcceráđđehus, 040 537 8853, alexander.kopf@metsa.fi
- www.luontoon.fi/valimaa
- www.metsa.fi/rauniolinnat-hanke (suomagillii)
WWF lea máilmmiviidosaččat doaibmi beaktilis luonddusuodjalanorganisašuvdna, mii movttiidahttá olbmuid ja servošiid bargat birrasa suodjaleami ovdii. WWF lea ordnen ovttasbargoleairraid jagi 1977 rájes sierra guovlluin Suomas. Leairrat fállet juohke geasi čuođenár friijadáhtolažžii vejolašvuođa konkrehta luonddusuodjalanbargui.
Meahcceráđđehusa luonddubálvalus vástida Suoma čábbáseamos luonddu dikšumis ja doaibmá leairra isidin. Stuorámus oassi WWF:a ovttasbargoleairrain ordnejuvvo Meahcceráđđehusa luonddubálvalusa hálddašan guovlluin nugo našunalpárkkain dahje kulturárbečuozáhagain.